ଓଡ଼ିଆ ଭାଷାରେ ବିଶେଷ୍ୟ, ସର୍ବନାମ ଓ ବିଶେଷଣ ପଦର ଲିଙ୍ଗ ବିଚାର କରାଯାଏ । ବିଶେଷ୍ୟ ପଦର ଅର୍ଥକୁ ନେଇ ତାହା ଚାରୋଟି ଶ୍ରେଣୀର ଲିଙ୍ଗ ମଧ୍ୟରୁ କେଉଁ ଶ୍ରେଣୀୟ ସ୍ଥିର କରାଯାଏ, ଅର୍ଥାତ ପଦର ପ୍ରକୃତି ଗତ ଲିଙ୍ଗକୁ ଅନୁସରଣ କରି ଲିଙ୍ଗ ନିର୍ଣ୍ଣୟ କରାଯାଇଥାଏ । ଏହି ଲିଙ୍ଗଭେଦ ଦ୍ୱାରା ବାକ୍ୟରେ ଥିବା  ଅନ୍ୟପଦମାନଙ୍କର ଯଥା - ସର୍ବନାମ, କ୍ରିୟା ପ୍ରଭୃତିରେ କୌଣସି ପରିବର୍ତ୍ତନ ଘଟେ ନାହିଁ । ଓଡ଼ିଆ ଭାଷାରେ ବଡ଼, ସାନ, ଛୋଟ ପ୍ରଭୃତି କେତେକ ବିଶେଷଣ ପଦ ବିଶେଷ୍ୟ ପଦ ପୂର୍ବରୁ ବ୍ୟବହୃତ ହୁଏ । ସେହି ପଦଗୁଡ଼ିକ ଆକାରରେ ପରିବର୍ତ୍ତିତ ନହେଲେ ପୁଂଲିଙ୍ଗ, ସ୍ତ୍ରୀଲିଙ୍ଗ ଓ କ୍ଲୀବଲିଙ୍ଗରେ ବିଶେଷଣ ରୂପ ବ୍ୟବହୃତ ହୁଅନ୍ତି । ସର୍ବନାମ ପଦ ବିଶେଷ୍ୟ ପଦ ପରିବର୍ତ୍ତେ ବ୍ୟବହୃତ ହେଉଥିବାରୁ ତାହା ବିଶେଷ୍ୟର ଲିଙ୍ଗ ଗ୍ରହଣ କରେ ।