ଓୟାଲଟେୟାର ଗୋଟିଏ ସ୍ୱତନ୍ତ୍ର ନଗର ନୁହେଁ । ବୈଜାଗର ଉତ୍ତର ଅଂଶର ନାମ ଓୟାଲଟେୟାର । କେତେକ ବର୍ଷ ପୂର୍ବେ ଏହା ଜଙ୍ଗଲମୟ ଥିଲା । ବୈଜାଗ ନଗରବାସୀ ଏଠାରେ ପାରିଧି କରୁଥିଲେ | ଆପାତତଃ ଇଂରେଜମାନେ ଜଙ୍ଗଲ ପରିଷ୍କାର କରି ଓୟାଲଟେୟାର ନାମ ଦେଇଅଛନ୍ତି । ଓୟାଲଟେୟାର ଘନବସତିପୂର୍ଣ୍ଣ ନୁହେଁ । ଏ ଦେଶର ଇଂରେଜବସତି ଯେପରି ହୋଇଥାଏ, ସେହିପରି । ଗୋଟିଏ ଗୋଟିଏ ଖଣ୍ତୃଶୈଳ ଉପରେ, କଦାଚିତ ପ୍ରାନ୍ତର ମଧ୍ୟରେ ଗୋଟିଏ ବଙ୍ଗଳା । ଏହି ବଙ୍ଗଳାଗୁଡ଼ିକ ପରସ୍ପର ଦୂରବର୍ତ୍ତୀ, ସମ୍ପର୍କ ବିଚ୍ଛିନ୍ନ, କଦାଚିତ ଫଳପୁଷ୍ପର ଉଦ୍ୟାନବେଷ୍ଠିତ । ପ୍ରତ୍ୟେକ ବଙ୍ଗଳା ଭିନ୍ନ ଭିନ୍ନ ଆକାରରେ ଗଠିତ । ଶୈଳଶିଖରସ୍ଥ ବଙ୍ଗଳାକୁ ଯିବା ସକାଶେ ପର୍ବତ ପାଦଦେଶରୁ ସୋପାନାବଳୀ ନିର୍ମିତ । ପ୍ରତ୍ୟେକ ବଙ୍ଗଳାର ଅଳିନ୍ଦକୁ ସାଗର ଲହରୀ ସୁନ୍ଦର ଦୃଶ୍ୟ ହୁଏ । ଏଠାରେ ଦିବାରାତ୍ର ପ୍ରବଳବେଗରେ ସଜଳ ପବନ ପ୍ରବାହିତ ହେଉଅଛି । ଗ୍ରୀଷ୍ମର ସମ୍ପର୍କ ମାତ୍ର ନାହିଁ । କୌଣସି କୌଣସି ବଙ୍ଗଳାର ଚତୁର୍ଦ୍ଦିଗରେ ବିରଳ କେତକୀକୁଞ୍ଜ ସୁଶୋଭିତ । ସମୁଦ୍ର କୂଳସ୍ଥ ପ୍ରାନ୍ତର ନାରିକେଳ ଓ ତାଳ ବୃକ୍ଷରେ ପରିପୂର୍ଣ୍ଣ ।