ਅਖੀਆਂ ਅਖੀਆਂ ਵਿਚ ਫ਼ਰਕ ਹੁੰਦਾ ਹੈ,

ਦੇਖੋ ਅੱਖਾਂ ਹਜ਼ਾਰ ਦੀਆਂ ।

ਇਕ ਮਾਰਦੀਆਂ, ਇਕ ਠਾਰਦੀਆਂ,

ਇਕ ਡੋਬਦੀਆਂ, ਇਕ ਤਾਰਦੀਆਂ ।

 

ਇਕ ਸਹਿਮ ਦੀਆਂ, ਇਕ ਰਹਿਮ ਦੀਆਂ,

ਇਕ ਜਿੱਤ ਦੀਆਂ, ਇਕ ਹਾਰ ਦੀਆਂ ।

ਇਕ ਭਰਮ ਦੀਆਂ, ਇਕ ਸ਼ਰਮ ਦੀਆਂ,

ਇਕ ਵੈਰ ਦੀਆਂ, ਇਕ ਪਯਾਰ ਦੀਆਂ ।

 

ਇਕ ਪੀਰ, ਫ਼ਕੀਰ, ਅਮੀਰ ਦੀਆਂ,

ਇਕ ਮੀਰ, ਸਫ਼ੀਰ, ਵਜ਼ੀਰ ਦੀਆਂ ।

ਇਕ ਮਜਨੂੰ, ਪੁੰਨੂੰ, ਰਾਂਝਣ, ਤੇ

ਇਕ ਲੈਲਾ, ਸੱਸੀ, ਹੀਰ ਦੀਆਂ ।

 

ਇਕ ਹਸ ਹਸ ਖੱਸ ਲਿਜਾਣ ਰਿਦਾ,

ਇਕ ਰੋ ਰੋ ਦਿਲ ਨੂੰ ਚੀਰਦੀਆਂ ।

ਉਹ ਚੁਪ ਰਹਿ 'ਚਰਨ' ਝੁਕਾਨ ਜਿਵੇਂ

ਇਕ ਸੁੰਦਰੀ ਦੀ ਤਸਵੀਰ ਦੀਆਂ ।